العربيات الصيني … والكوكتيل 😎

img

 هوجة عربيات صيني طافحة في البلد ملهاش ملة ولا توثيق لأي اختبارات امان او ثبات او تسارع او شئ يعرفنا ايه الي جاي ده

أكبر الوكلاء بتتسارع دلوقتي على مين ياخد العربيه ديه قبل التاني بعد تراجع مبيعات عربياتهم الأساسية بسبب اسعارها المبالغ فيها الي مش بتتناسب مع دخل المواطن و على جانب آخر موضوع التقسيط بقا صعب و الفوايد عاليه جدا

انهاردة محدش بيشتري زيرو غير الطبقة العليا من المجتمع أو الي جايبها يشغلها فقط لا غير

انهاردة كل وكالة حابة تضم معاها ماركة ولا اتنين صيني تسوقهم في مصر

و التسويق بيكون ذكي جدا للعربيات ديه

فيه خطوات محسوسة و خطوات غير محسوسة للبعض

العربيه بيبتدي الكلام عليها من قبل ما الوكيل يتعاقد عليها اصلا و يكون وكيل ليها

رغي كتير على جروبات الفيس بوك و بعدها ان شاء الله جروب فيس بوك مسئوليه مأجورين يبدأو يتكلمه عن العربيه و يفخمه فيها

واحدة واحدة يبتدوا يرموا كلام ان غبور مثلا خد الماركة كذا يشوفه رد فعل الناس عليها ايه !

حس ان فيه رد فعل قوي و الناس شايفه عربيه حلوة شكلا و صالون و زراير كتير و توكيلها معروف و فروعه كتير و اكيد ها يوفرلنا قطع غيار ليها

التوكيل يبتدي ينزل مثلا 20 عربيه كل واحدة في فرع و حملة التسويق تشتغل على النت و الطرق و الصحف و اعلانات ممولة و اعلانات اليوتيوب و على التليفزيونات على القنوات الهابطة باشتراك اي ممثل او مغني هابط عشان ياخد قرشين

و بعد كده عن طريق ما يسموا مراجعين السيارات على النت

(اه عشان ما تعملش نفسك اتفاجئت) 😏

و ال 20 عربيه مثلا في كل فرع هو مش منزل غيرهم مثلا حس ان فيه إقبال عالي

يبدأ يجر رجلك

عايز ؟

احجز ادفع عربون و خد وصلك و اتكل على الله على حس ال 20 عربيه يبيعله 200 عربيه منها و يبدأ بعد كده يجيب دفعة جديدة من برة مصر مش هتاخد معاه 25 يوم شحن

انهاردة اكتر من توكيل بيضربه نفسهم بالجزم انهم ما خدوش زوتي

مش لحلاوتها عشان حجم المبيعات الضخم الي حصل ده و ما زالت الحجوزات و الطلبات تتوالى

بنتكلم في المواضيع ديه كتير محاولة من وقت للتاني ان الناس تفوق و تفهم هي رايحة لفين

العروض شبه مغرية
عربيه شكل حلو كبيرة واسعة فخمة جميع الكماليات الي تحلم بيها العربيه مش محتاجة حتى فيما بعد تروح لحد بتاع كماليات يضيف حاجة فيها
بسعر أقل النص عن الي شبهها سواء في الكوري او الياباني

ياريتها عربيات تستاهل في الاخر إنما عربيات ما تعرفش اصلها ايه و فين

شرايط كوكتيل بنسمعها

تقفيل صيني موتور ياباني فتيس الماني كاسيت ايطالي جنوط اندونيسي فرش صمالي غوريلا اسباني و عربيات مرقعة من كل حتة شوية

و هل كعربيه ليها في الاخر طعم ركوب لأ

يا عم انت كمان عايز بالفلوس ديه تحس ب ركوب انت طماع اوي

طيب العربيات ديه فيها امان تتركب

مش قصدي ال abs و ال 15 ايرباج الي فيها المشاكل و البلاوي الي بنشوفها على طول في الصيني و الفرامل الي ما بتلمش و الكنترولات الي بتهيس من اول 1000 كم و العربيات الي بتستهلك بنزين قد تريلا و هي 1600 و المشاكل الغريبه الي بتحصل ديه

العربيات ديه بتفكرني بالموبايلات تنزل العتبة مثلا ولا شارع عبد العزيز تلاقي محل موبايلات عنده اجهزه أندرويد قد الشبشب فيها كل حاجة و شكلها حلو لا انت عارف اسمها ولا هي كمان عارفه هي مين
تليفون يبقا فيه كل حاجة ب 500 جنيه لحد ال 1500 جنيه حاجة بقا كده premium و صداع من كتر الشياكة و النزاهة

و كل الي بيزعل في الاخر و يخسر هو الزبون

الي بيرجع يشتكي و يعيط و يتحول من طبال في جروب العربيه لمشتكي و مناضل في جروبات مشاكل الفيس بوك الي بتلم react اغضبني بس ديه الي ما بتعملش حاجة مفيدة في حياتها و يرجع يقول كنت فاكرها تبع توكيل كبير زي فولان و فولان و ضحكه عليا و انا عايز فلوسي او اخد عربيه تانيه زيرو و ديه حالة بتحصل بس لما بتكون نايم و متغطي كويس

الي فات كانت النسخة التجريبية لسه ما شوفناش حاجة الهوجة الأكبر للعربيات الصيني قادمة اشكال و أنواع و أكبر الوكلا هما المتصدرين للعربيات ديه عشان تقتنع اكتر 👌

الموج جاي عالي بس عايز الي يفهمه لا ياخده في وشه 👊

الكاتب رامـــــي أحمــــــد

رامـــــي أحمــــــد

مواضيع متعلقة

اترك رداً

Social Media Auto Publish Powered By : XYZScripts.com